10 december – 17.00 – Ik was zuver wat mu van de drokke laeste daegen. Dan kuj’ toch werachtig marken daj’ gien twintig meer binnen! Daoromme he’k et vandaege mar wat rustig an daon. Ik hebbe een kollum naor de kraante stuurd en die van teveuren vanzels nog es goed naokeken. En ik bin begonnen mit et schrieven van alle kast- en ni’jjaorskaorten. Dat is ieder jaor ok een hiele put wark. Ik kreeg de eersten zels vandaege al. Ik hebbe ok nog wat verhaelen rippeteerd veur de optredens van morgenmiddag en –aovend.
  Vandemorgen kwam d’r ok nog een verrassing mit de post. Et jaorlikse kastpakket veur de postaktiven van de belastingdienst. Allegeer lekker spul!
  Hieronder nog een foto van gister. Vanof de brogge is dit de Kuunder in westelike richting. Hier he’k gistermorgen bi’jlanges fietst. Vroeger het de Kuunder vanzels vule mooier en kronkeliger west. Ze hebben d’r eins mar een malle, rechte lineaal van maekt.


9 december – 20.00 – Vanaovend hewwe hier oonze wintervergeerdering van de JVS had. Ik hebbe de bestuursleden om half vufe eerst appelgebak veurzet da’k vandaege maekt hadde! En doe hewwe vergeerderd en o.e. een statutewieziging goedkeurd. Dat mos omdawwe et bestuur uutbreiden wollen. Alle bestuursleden wo’n zo staorigan toch wat ooldere meensken. We moe’n dus verjongen en meensken in et bestuur zien te kriegen die in ieder geval flink jonger as zestig binnen. Mit de statutewieziging wodde et meugelik dat Jan Berend van Elp uut Berkoop onderdiel van et bestuur uutmaeken gaot. Nao de vergeerdering hewwe hier mit mekeer waarm eten. Ik hadde gratineerde eerpelties uut de ovend, grune boonties, zute appelties, runder slavinken, en crème-toeties in alderhaande soorten en smaeken.
  Vandemorgen he’k Berkoop nog even ommefietst. Et was heerlik fietsweer! Bi’j de Berkoper brogge over de Kuunder zag ik een fuut die krek een vissien deurslokte. Zol dat wel lekker wezen? Dan he’k toch liever gratineerde eerpelties uut de ovend! Hieronder een foto van vandemorgen: de Berkoper karke in de decemberzunne.


Naor de volgende bladziede - Naor de veurige bladziede