20 december – 13.50 – Over een peer weken bin ’k jaorig en wor ik 70… Over die leeftied zuwwe et veerder niet hebben. Ik vien et verschrikkelik, want de tied en et leven gaon vusen te hadde veurbi’j. Mar ja, mien moeder zee altied: ‘Aj’ niet oold wodden willen, moej’ je veur de tied ophangen.’ Et is dus mooi da’k zo oold wodden bin, dat ha’k vroeger nooit docht. Ik docht altied da’k niet oold wodden zol. Mar ik vien et toch een leeftied van niks. Ik hole trouwens toch mar een klein fesien. Dat doe ’k om de vuuf jaor. Een klein koppeltien naoste femilie en vrunden komt me die dag fielseteren in oons mfc De Ni’je Stienze. Veur vandaege mossen ze ofzeggen as ze niet kwammen en… ik hebbe mar een peer ofzeggings had. Lao’we d’r dan mar een mooie dag van maeken!
  Ik stappe zo in de auto en gao naor De Koornbeurs in Franeker. Ik mag, krek as vleden jaor, mitdoen an de Midwinterjûn. Tal van verhaelevertelders, zangers en muzikaanten doen mit: Jaap Louwes, Douwe Kootstra, Aant Jelle Soepboer, Margot Vermeulen, Frederique te Dorshorst, Gerbrich van Dekken en ik dus. We kommen aanst bi’j mekaander in De Koornbeurs en daor geft zanger Jaap Louwes eerst een optreden van drie kertier. Daornao gao’we allegeer naor een aander plak in de stad. Ik mag vertellen in de biebeltheek en dan kommen d’r vuuf keer 25 meensken bi’j me langes. Ik vertelle dus vuuf keer etzelde verhael veur iederkeer weer aandere meensken. De Midwinterjûn is trouwens hielemaole uutverkocht. An et aende is Gerbrich van Dekken an de beurt en dat is weer in De Koornbeurs. En dan… is d’r om 8 ure nog een winterstamppotbuffet! Op naor Franeker! De biebeltheek, daor ik vertellen mag, is in et RK Verieningsgebouw an et Sunt Martiniplantsoen.


19 december – 16.30 – Et was gistermiddag en –aovend hiel genoeglik mit Freerk en Herman. Doe ze om kwat over achte weeromme naor huus zollen in Peize en Grunningen hebben ze tegen me zegd dat ze mien eten lekker vunnen hadden. En now mar hopen dat ze d’r gien miskommen van had hebben. Ik hope niet dat et ooit gebeurd is dat meensken, die bi’j me eten hebben, nao vuuf kilemeter al uut de auto mossen om te spi’jen. De beide mannen nammen trouwens een dikke ammarillebolle veur me mit. Die he’k vandemorgen drekt oppot en waeter geven. De aandere elf ammarillen die ’k hebbe bin nog diepe in de winterslaop. Die hael ik op ni’jjaorsdag weer veur ’t locht.
  Vandemorgen he’k al weer op ’e fiets naor Berkoop west. Even naor de winkel daore om boerebotter, want ik hebbe vandemiddag veur de eerste keer van mien leven een botterkoeke bakt. Hi’j is heerlik wodden!
  Ien disser daegen kwam et alderlaeste nommer van et Grunninger tiedschrift Krödde. Et het sund 1982bestaon en ik bin d’r op ’e eerste peer jaor nao altied abonnee van west. En now is et gebeurd. D’r bin gien vri’jwilligers meer te kriegen. D’r gaot te vule verleuren.
  Ik stappe zo naor oons mfc en daor stap ik dan weer om kwat over vufe mit een koppeltien aandere meensken in een bus. D’r zit dan al een koppel volk uut Berkoop in die bus. We rieden naor hotel-resteraant Brinkzicht in Vledder en daor hewwe et jaorlikse kastdiner van de O.S.O.N. De onofhaankelike senioreverieninge (Olde)berkoop en Ni’jhooltpae. Tot veur kot was dat de Anbo, mar die vaalt hielemaole uut mekaander. Ik hebbe veur 1 december ok as lid bedaankt en bin now dus lid van de O.S.O.N. We gaon aanst mit mekeer lekker eten en luusteren naor een kastverhael dat verteld wodt deur Cor Haze uut Berkoop. Dit wodt een mooie aovend!

Naor de volgende bladziede - Naor de veurige bladziede