26 december – 15.20 – Doe ’k een schoffien leden verhaelen vertellen moch in et karkien van Katliek, kree’k as kedo nao ofloop et boek Katlijk door de eeuwen heen mit een veurwoord van Geert Mak. Ik hebbe et boek mit groot genoegen lezen. Katliek leit in wezen vlakbi’j de Stellingwarven. Allienig de Kuunder leit d’r tussen. Et kwam me eins allemaole hiel bekend veur. Zo is et mit alle kleine dörpen deur de jaoren henne gaon. Hoe God verdween uit Jorwerd en dan kuj’ elk willekeurig dörp veur Jorwerd invullen. Een mooi boek!
  Ik stappe zo op ’e fiets, et is krek veurjaor, en dan gao ’k naor Jan zien moeder in Wolvege. Roelien en Twan kommen daor ok en die nemen lekkere happies en zo mit. Et wodt dus grif hiel gezellig! Ik moet vanzels wel zien da’k weer thuus bin veurdat Downton Abbey begint. De serie is haost oflopen en dat is vanzels meer as verschrikkelik. Jaorenlaank kwam dat volk bi’j me in huus. Et is krek as ken ik ze allemaole persoonlik. Ik zol niet iens vremd toekieken a’k ze hier op ’e diek tegenkommen zol. Hoe moe’k now aanst zonder heur? Lord en lady Grantham, oftewel Robert en Cora, lady Mary, Tom, Violet, mr. Carson, Anna, mr. Bates, mrs. Crawley, Daisy en al die aanderen… Hieronder links op ’e foto de oolde gravinne, de moeder van lord Robert Grantham.


25 december – 16.00 – Ik hebbe vandaege een lekkere kruudkoeke bakt, naor de kasttoespraoke van de keuning keken en luusterd, en in klad een kollum schreven over mien belevenissen mit een peer vrouwluden, gister in et ziekenhuus.
  Gister kwam d’r een mailtien vanuut Grunningen. De heufdredaktie van NDC Mediagroep bedaankt me as freelance mitwarker (van de Liwwadder Kraante) veur de plezierige saemenwarking en weenskt me goeie feestdaegen toe en een saemheurig 2016. As dat laeste es waor wezen kon. Zo zol et moeten, mar… Ze stuurden een mooie foto mit van Marcel Juriaan de Jong. De 150 inwoners van et Drentse dörp Oranje en de 700 asielzukers daore vieren mit mekeer kastfeest. Mit mekeer! Awwe ooit een betere wereld kriegen willen, dan zuwwe et mit mekeer veur mekaander boksen moeten! Mar die betere wereld liekt op et aende van dit jaor bi’jtieden veerder vot as ooit. Mar zat in de deuze van Pandora niet toch nog de hope?


Naor de volgende bladziede - Naor de veurige bladziede