2 jannewaori – 17.00 – Een peer weken leden wodde ’k interviewd over mien roman Een vrouw vanivoor in et pergramme van De Literaire Hemel in dorpskefé De Amer in Amen. Ik kreeg daor doe nao ofloop een prachtig boek kedo: Rondeten in Amen van Rob Schouten. Rondeten is Drents veur hier en daor je kossien bi’j mekeer scharrelen. Aarme meensken kregen vroeger van meensken in et dörp een bod waarm eten. Ze gongen dus uut rondeten. Rob Schouten (Hilversum, 1954) dee dat ok. Hi’j is dichter, schriever, vertaeler en kollumnist van et dagblad Trouw. Begin april 2011 wodde hi’j uutneudigd deur de Stichting De Literaire Hemel en Stichting De Amer en kom elf daegen as writer in residence te gaaste in Amen. Hi’j pruufde de sfeer in et dörp en de omgeving, sleup in kefé De Amer en at aovens bi’j verschillende inwoners van et dörp. As een literaire schaophuder trok hi’j deur Amen dat nog gien honderd inwoners het, mar broest van de aktiviteiten. Een literaire kroniek van elf daegen in et Drentse laand. Een mooi boek!


Naor de volgende bladziede - Naor de veurige bladziede