4 jannewaori 16.00 Ik hebbe de laeste daegen een stokmennig interessaante artikels lezen in De Vrije Fries, et jaorboek dat uutgeven wodt deur et Koninklijk Fries Genootschap voor Geschiedenis en Cultuur en de Fryske Akademy. De volgende artikels hek lezen: Frisones de Stellingwarf, Historische constructies van een talige identiteit van Kees Kuiken, Publieke welkomstredes voor prinselijke studenten aan de Franeker universiteit van Sybren Sybrandi en Rients Agema (1854-1913): een slachtoffer van klassenjustitie.
  En zomar inienend is et winter. Et vreur licht en et snijde vandaege zo now en dan ok licht. Et zal niet lange duren, mar de wereld het dan toch even wit west. Dit zag ik vandemorgen vanuut mien slaopkaemerraem.


3 jannewaori 17.00 Vandemorgen hek de kastboom weer oftuugd en naor de zoolder brocht. Dat hewwe ok mar weer had. Vandemiddag bin k naor Jan zien moeder in Wolvege west om heur veul heil en zegen veur et nije jaor toe te weensken. Ze hoopt van t jaor 90 te wodden! Dat is een hiele leeftied!
  Gister hek veur t eerst een bolle bakt. Ik heurde op ooldejaorsaovend bij Haarm en Jacob dat die wel cranberry/neute-bollen bakten. Dat ik bin gistermiddag drekt naor de Welkoop west om mael en hebbe me votdaolik zoen bolle bakt. Et is prima lokt en et smaekt heerlik! Ik bakke wat of! En gisteraovend was dan echt de alderlaeste oflevering van Downton Abbey, ien van de mooiste series die k ooit zien hebbe. Misschien wel de aldermooiste! En et kwam toch nog goed mit lady Edith en heur Bertie. Dat ik kon rustig slaopen gaon. Hieronder de grafelike femilie en et passeniel. Up and Downstairs.


Naor de volgende bladziede - Naor de veurige bladziede