12 jannewaori 18.00 Ik bin vandemorgen om goed half tiene in Wolvege in de trein stapt en hebbe me deur de Spoorwegen naor Amsterdam rieden laoten. In de trein hek de kraante lezen en ik hadde een boek bij me. De thriller Van de doden niets dan goeds van Tomas Ross dak op mien verjaordag kregen hebbe. In Amsterdam hek eerst wat eten in t Nije Kef naost de Nije Karke en doe bin k naor Museum Hermitage an de Amstel kuierd. Daor hek de prachtige tentoonstelling Spaanse Meesters uit de Hermitage bekeken. Schitterende petretten van de grote Spaanse schilders: Goya, Velzques, Murillo, Zurbarn, Ribera, El Greco en een protte aanderen. Mar dr weren ok etsen, meubels, glaswark, waopens en harnassen te zien. Hiel mooi! Et was aorig dak een petret zag van Maria Golytsin, de vrouw van de Russische ambassadeur van eertieds in Spanje. Ik hebbe laestdaegs krek et boek Verloren Adel. De laatste dagen van de Russische aristocratie lezen en dat gaot ok over de preenselike femilie Golytsin. Toevallig! Doe k in Amsterdam weer in de trein zat zag ik boven op de trein an de aandere kaant van et perron een dooie roofvoegel hangen. Die hadde him vermoedelik te pletter vleugen op e trein. Ie bin gien dag zeker van je leven. Meensken niet, mar voegels ok niet. Et was een goed bestede dag! Hieronder een foto. Gert en Hermien hek niet op e Dam zien, mar de doeven wel. Een vrouw zat dr op een stoeltien vlakbij fotos van te maeken.


11 jannewaori 17.00 In iene middag hek et boek Djinn van Tofik Dibi uutlezen. Een mooi boek! Dibi zat van 2006-2012 veur GruunLinks in de Twiede Kaemer. Ik dit boek bekent Dibi, die van Marokkaanse komof is, dat hij homo is. Dat is in die kringen nogal wat om daor mit veur t locht te kommen. Hij beseft him dat hij zien femilie zeer doen kan mit dit boek. Mar ie kun je toch ok niet je leven laank verstoppen blieven. Eerst wil hij dr trouwens zels ok niet an, hij daenkt dat dr wat in him zit dat wel vot te kriegen is. Mar et gaot mar niet vot. En wat zullen ze wel niet zeggen as ze et geweerwodden Et is een eerlik en mooi boek en ik hebbe et dus in iene goeze uutlezen. Hoe hij, as hij al in de Twiede Kaemer zit, naor New York gaot. Daor kent gieniene him ommes en daor dust hij stiekem wel an et toe te geven. En dan wodt hij daor in mekaander sleugen Hopelik zet dit boek meensken in de Marokkaanse gemienschop an om ok mar es mit de waorhied op e lappen te kommen. Want jim daenken toch zeker niet dat Tofik Dibi de ienige is?
As t even mitzit wik morgen eins mit de trein naor Amsterdam om daor in Museum Hermitage de tentoonstelling Spaanse Meesters uit de Hermitage te bekieken.


Naor de volgende bladziede - Naor de veurige bladziede