14 jannewaori 17.00 Ik bin vandemorgen om elf ure tillefonisch interviewd deur Hedwig Terpstra veur Breeduit, een huus-an-huus kraante in de gemiente Smallingerlaand. En dat allegeer in verbaand mit de nommenaosie van mien roman Een vrouw van ivoor veur de Rink van der Veldepries 2016. We hebben een half ure mit mekeer praot. Ze zal alles in et Fries schrieven en stuurt et me dan toe zodak mien antwoorden in et Stellingwarfs vertaelen kan. Dat moet allegeer veur zaoterdag klaor wezen. Alle nommeneerde schrievers won trouwens veur die kraante deur heur interviewd. Op verzuuk hek ok een peer fotos van mezels toestuurd, zodat ze daor iene van bij et vraoggesprek zetten kunnen.

13 jannewaori 18.00 Et was een hiele drokke dag. Ik bin, krek as gister, de hiele dag weer op e vlieg west. Vandemorgen om half tiene hebben Pieter en ik in netaoriskantoor De Werven in Oosterwoolde de anpaste stichtingsakte van de JVS mit ondertekend. Daornao biwwe tegere naor et Centrum veur Prentkeunst op e Fochtel gaon. Daor hewwe genoeglik zeten te praoten mit een bakkien drinken dr bij. Van De Fochtel bin k naor huus gaon. Daor hek de katten in de gauwighied wat eten geven. Nao twintig menuten bin k doe naor Et Vene gaon. Daor hek bij kapster Bertha een brotien en een koppien sop had en ze het me et haor nog even daon. Vervolgens hek veur de bewoners van flat De Veiling, daor Bertha ok woont, verhaelen verteld in et gebouw van Saemen Onderweg dat daor vlakbij is. Et was een heerlik optreden, ik kon de meensken hielemaole mitnemen in mien verhaelen. En as dat lokt is et heerlik wark! Nao et vertellen hek bij Bertha nog een bakkien drinken had en een eigenmaekt amandelbrotien. Heerlik! En now bin k dan eindelik krek weer thuus

Naor de volgende bladziede - Naor de veurige bladziede