21 jannewaori 17.00 Vandemorgen hebben de timmerluden et kerwei ofmaekt. Ik hebbe now geuten en wiendveren van keunststof. Et is mooi wodden en dit zit mien tied wel uut. Ik hebbe de manluden vandemiddag veur de laeste keer een panne sop veurzet. Vandaege: poddestoelesop. Ik hoeve now morgens niet meer om goed zeuven ure van bedde en kan tussen de middag weer waarm eten. Alles is weer gewoon. De katten bin bliede toe. Binnenkot komt dr trouwens nog een keer een timmerman, want ik kan de veurdeure an de buterkaant vaeke niet los kriegen. Dr moet nije slotteboel in, et oolde spul is versleten. Gelokkig dak ok nog een aachterdeure hebbe.
  Vandemiddag hek wat boeken veur de verkope ophaeld bij uutgeverije Bornmeer op e Gediek: In brge fan gls en Pake en beppe Pluus. En vanaovend gaok de diek uut te vertellen. Ik mag vanaovend in Kolkzicht in Surhuustervene verhaelen vertellen veur een koppeltien plattelaansvrouwluden. In 1992 en 1999 bin k eerder bij heur west te vertellen. Ik hebbe dr wel nocht an!

20 jannewaori 17.00 De timmerluden bin dr de hiele dag weer west en ze kommen morgen ok nog weer. Et duurt langer as dak docht hadde. Mar ik was now de hiele dag thuus en kon heur tussen de middag weer een panne waarme sop veurzetten.
  Lessend hek een stokmennig vroege romans van Durk van der Ploeg kocht. Daor hek now De dei lkt nei de jn van lezen. Een mooi boek. Van der Ploeg schrift over de meensken in et kleine drp Twifel. Over benauwdens, verdriet, ofgeunst en verburgen verlangsten. Duotsje Althusisus is stiekem gek op meneer Gabril die bij heur in de kost is. En dan Duifje Een meid die alle kerels in et drp de huud overstuur maekt. Zels domenee Wolke Uittentreure kikt heur vaeke stiekem nao deur et raem van zien studeerkaemer en zol ok wel van alles mit heur doen willen. Mar de domenee is trouwd Hieronder een foto van Durk van der Ploeg van Reyer Boxem.


Naor de volgende bladziede - Naor de veurige bladziede