23 jannewaori 17.00 Doe k mien oolde auto nog hadde hak Haarm Tom-Tom altied bij me. Die vertelde me algedurig in et Stellingwarfs hoe ak rieden mos. Dat was vertrouwd. Now hek een vrouw bij me. Dat is op himzels al een kultuurschok, mar die tutte wet ok niet iens hoe ze bepaolde naemen uutspreken moet. Wat een knoffelkont! Awwe bij Wolvege binnen, het die blei et over Wolvga. Mit de klemtoon op e twiede lettergrepe. Zol die hutsjeflut de ulo wel ofmaekt hebben?
  Vanaovend zak naor de nijjaorsbijienkomst van de Stellingwarver Schrieversronte in Mejander in Berkoop. Dr won volksverhaelen verteld deur Klaasje Herder en de Nedersaksische manludegroep k Wait nait gaot zingen krek as de Hoeviger fermaosie de Scheve Schaats Band. Et kon best wel es een mooie aovend wodden!
  En dan nog even over gisteraovend. Dat was zeker een moooie aovend. Et tenielstok Bloedverwanten wodde prima speuld deur Derek de Lint, Henritte Tol, Saskia Temmink en Tanja Jess. Ik hadde docht dat ze ok een keer pauze holen zollen. Dat doe de gedienen op een bepaold ogenblik dichtegongen docht ik dat et negen ure en schoft was. Mar doe was et al tien ure en oflopen. Ze hebben dus twie uren aachter mekeer deurspeuld. Geertje en ik hebben dr een mooie aovend an had. Ik bin trouwens een fan van Henritte Tol. Dat wak al ak ze op e tillevisie zag, mar gisteraovend dus ok. Die kan speulen! Hieronder een foto van de speulders: v.l.n.r.: Henritte Tol, Derek de Lint, Tanja Jess en Saskia Temmink.


22 jannewaori 16.00 Et is een slim roezige en drokke dag. Vandemorgen hek in Burgum op vesite west bij Peter en Janneke. Dat hak es een keer beloofd en waj beloven moej ok doen. Et was wonderlik dat heur straote niet op mien navigaosiesysteem te veurschien toverd wodden kon. Dat wodde dus oolderwets bij et begin van Burgum op een bod kieken waor die straote percies was. Mar och, zo kan et dus ok nog. Et was hiel genoeglik bij heur en we konnen et wel praotende holen. Ik hebbe dr tussen de middag ok eten. Nao et eten bin k naor De Harkema reden om Saakje een vest weeromme te brengen dat ze hangen laoten hadde in oons mfc. Saakje was niet thuus, die was naor een begraffenis, mar ik wus waor ak et vest henneleggen kon. Vervolgens bin k naor huus reden, daor ik bliede verwelkomd wodde deur de poezen. Die hebben een aekelike dag, want ze moen dr now al weer uut. Ik stappe zo weer in de auto en gao naor Sieger en Geertje in Liwwadden. Bij heur eet ik vanaovend waarm. Stamppot zoerkool! Nao et eten gao k mit Geertje naor schouwburg De Harmonie. We gaon naor et tenielstok Bloedverwanten. Dat het ok as serie op e tillevisie west en now toeren ze dr mit as tenielstok deur et laand. Vannaacht hoop ik weer thuus te kommen. Hieronder nog een foto van vandemiddag. Van Burgum naor De Harkema kwam ik bij Kootstertille langes. Daor hek de karke mar even op petret zet.


Naor de volgende bladziede - Naor de veurige bladziede