28 jannewaori 17.00 Ik hebbe et boekien Grijs gebied van Marion Pauw lezen. Neffens mij is Pauw femilie van de Drentse schriefster Marga Kool. Et staot me mar zo bij dat et nichten binnen. Et boek gaot over Naomi die naachs deur Amsterdam fietst en onder een viadukt grepen wodt deur een man mit griezelig lochtige ogen. Dr is iene getuge. Een man die vanof zien balkon toekikt. Mar waoromme dot hij niks? Et is een boek om aachter mekeer uut te lezen!
  Zo now en dan kriek de laeste tied een mailtien mit de tiedinge dat dr een bericht veur me is van een vrouw die stoute ofspraokies maeken wil. Vandaege een zekere Anne Mien hemel nog an toe, ik wil hielemaole gien stoute ofspraoken mit vrouwluden maeken. Dat ze dat niet begriepen! Zokke aeventuurlike vrouwluden klik ik zo hadde meugelik vot! Ik moet zokken hier niet om de deure hebben te slepen!
  Vandemorgen hek een kollum schreven en vandemiddag hek op e fiets naor Jan zien moeder in Wolvege west. Et was mooi en zunnig fietsweer!

27 jannewaori 17.00 Ik kreeg gister een mailtien van een vrouw uut Berkoop die schreef dat mien kollum van gister in de kraante heur uut et hatte grepen was. Een man uut Oosterwoolde was et dr ok slim mit iens en mit dezelde bosschop belde dr nog een man uut Et Vene. Now, dat is mooi!
  Vandemorgen hek in Wolvege eerpels van de mark haeld. Doe k deur hadde wiend en regen weer thuuskwam hadde Boris intied een dooie moes bij de veurdeure daelelegd. As welkom thuus. Het een etisch gesprek nog nut? Vandemiddag hek veur de eerste keer van mien leven een witte bolle bakt en die is lekker wodden!
  Hieronder nog twie fotos van gister doe et in Haarlem mooi en zunnig weer was. Op e linkerfoto staot Teylers Museum daor ak die mooie tentoonstelling bekeken hebbe.


Naor de volgende bladziede - Naor de veurige bladziede