11 feberwaori 15.00 Vandaege hek de kaaste in et aachterhuus hielemaole opredded en schonemaekt. Ik hebbe de meterkaaste en de kaaste onder de trappe ok uutsopt en alle kassies in de slaopkaemer beneden hebben een beurt had. Dat is al weer slim flink van mezels!
  Vleden weke schreef ik in dit internetdagboek dak jim wat biezunders over mien oolde huus vertellen zol. De timmerman leut me op zien tillefoon een youtube-filmpien zien daor mien oolde huus in veurkomt. Jim kennen lichtkaans et illustere Friese zangduo Hepie en Hepie wel. Ak me niet verzinne bin dat nichten van mekeer die nog wel es spul hebben. Ze bin indertied beroemd wodden mit et nommer Ik lig op mn kussen stil te dromen. Mar et het blieken daon dat die beide vrouwluden een videoklip opneumen hebben bij mien oolde huus! Ze zingen daor et lietien Ons dorp/Us doarp en et hiem zit vol figuraanten. Hieronder staot et! Bekiek et mar es! Zo mooi is mien oolde huus en zo mooi bin/zingen Hepie en Hepie


10 feberwaori 17.00 Ik bin vandaege begonnen mit et rippeteren van alle verhaelen die k ankem weke vertellen mag. Ik zal dan drie keer vot, et liekt de goeie oolde tied wel! Aachterienvolgens naor Hoogevene, De Gediek en Oostermeer. Mar omdak lange niet zovule meer uut vertellen gao as vroeger moek vule meer rippeteren. Alles moet dr ommes wel goed uutkommen! De huud moet dr algedurig op!
  Ik hebbe een slim aorige kammeraod, die nogal schone en netties is, en die vertelde me gister dat hij et hiele huus al schonemaekt het en alle kassies ok. Now ja, de warkster hoolt mien huus wel schone, mar de kassies Dat moet zo now en dan vanzels wel gebeuren, mar zok wark hek hielemaole gien aorighied an. En toch hek vandemiddag mien beste bientien veurzet en alle keukenkassies schonemaekt en uutredded. Wat toch flink van mezels! Ik bin van doel en gao zo toerlings et hiele huus deur. Waoromme laok me toch zo benvloeden?

Naor de volgende bladziede - Naor de veurige bladziede