13 feberwaori – 17.40 – Ik bin vandemorgen om half achte al bi’j Pieter in de auto stapt en tegere biwwe naor de grafiekruilbi’jienkomst in et Stiendrokmuseum in Valkenswaard west. Dat is zudelik van Eindhoven. Een best aende uut de rook. Et was vandemorgen trouwens een mooie rit, de zunne was d’r bi’j en et laand onderwegens was wit beschosseld. Et was ok een gezellige dag en ik bin zokrek mit een protte mooie anweensten weer thuuskommen. Hieronder twie foto’s van vandaege. Links: de tentoonstellingsruumte van et museum. Rechts: Hier is krek een prente onthuld van de Belgische grafikus Hedwig Pauwels.


12 feberwaori – 17.20 – Vandemiddag he’k op ’e tillevisie keken naor de eupening van de grote Jeroen Bosch tentoonstelling deur de keuning in Den Bosch. Ik zol die tentoonstelling graeg zien willen, mar ik daenke niet da’k d’r hennegao. Et wodt daor geheid smoor- en smoordrok. En a’k argens een hekel an hebbe dan bin et grote kloften volk. Ik vien et al vervelend as et in de supermark drok is. Dus…
  Laeter op ’e middag he’k even op vesite west bi’j Jan zien moeder in Wolvege. Dat wodde ok meer as tied.
  Twie weken leden interviewde Douwe Kootstra radioman Eelke Lok in de Schierstienze in Veenwoolden. Ik kocht Eelke zien boek mit kollums It each fan Eelke doe en hebbe et boek intied uut. Een mooi boek! Hi’j schrift zien kollums in de regel wel wat pittiger as ik doe, mar weer minder pittig as Ferdinand de Jong dat bi’jtieden dot. In et boek komt ok een kollum over Oost-Stellingwarf veur. Dit schrift Eelke over burgemeester Harry Oosterman: De boargemaster is in fleurich mantsje. Nimmen hie ea fan him heard doe’t er as boargemaster beneamd waard. Nimmen sil him kenne as er aanst in kear ophâldt. Et zal over je schreven wodden!

Naor de volgende bladziede - Naor de veurige bladziede