15 feberwaori 17.00 Netuurlik hek vandaege verhaelen rippeteerd, mar ik hebbe de kaasten en kassies in de woonkaemer en in de slaopkaemers boven ok uutredded en schonemaekt. En ik bin mit een gedicht an de gang west. Ik schrieve eins gien gedichten meer. Ik hebbe wel een mooi tal veur een eventuele bundel klaorliggen, mar ik vien eins dak as dichter niet vule meer toe te voegen hebbe an wak al wel es zegd hebbe. Mar deur mar ien woord kom ik soms toch op een idee. Ik kieke praktisch iedere zundagmorgen naor et pergramme Boeken op e tillevisie en daor heurde k et woord tussenwereld en ik docht drekt dak daor wat mit doen mos, lichtkaans wel wat mit kunnen zol. Dat zodoende proes ik now toch nog weer es een keer mit een gedicht omme. Een gedicht over de tied van aanderhalf jaor leden doe k mit een zwaore longontsteking in et ziekenhuus lag. Ik hebbe dr eerder een gedicht over schreven. Over de gruwelike hallucinaosies die k daor naachs hadde. Dat vergeet ik nooit. Ik kan al die beelden nog zomar haorscharp oproepen, zien, en weer beleven. Ik hadde doe wel in de gaten dat et niet best mit me was, mar ik hebbe me vermoedelik niet realiseerd hoe arg. Ik hadde dr zomar niet meer wezen kund. Ik hebbe dweildeurnat van t zwiet mit 40,8 graoden koorse wel es docht: wie moet dr now aansen veur de katten zorgen? Ik leefde in een tussenwereld.

14 feberwaori 17.00 Gisteraovend vul et locht hier zomar uut. En niet allienig bij mij, mar overal op e buurt was et inienend stikkeduuster wodden. Ik hadde krek een buuslanteern pakt en zol op zuuk naor lucifes om waxinelochies anstikken te kunnen doe et locht ok zo weer anfloepte. We hebben niet half in de gaten hoe kwetsber awwe binnen. Zonder stroom kuwwe niks meer. Dat is aenlik hiel arg griezelig!
  Ik schreef laestdaegs dat et zo spietig is dak Haarm Tom-Tom niet meer bij me in de auto hebbe, mar zoen domme ente van et navigaosiesysteem. Ik vertelde jim doe dat ze tegen Wolvege Wolvga zegt. Mit de klemtoon ope middelste lettergrepe. En now heurde k dat ze De Jouwer (Joure) uutsprekt as Sjoere. Ie moen as vremde mar weten waor aj dan binnen! En Friestaelige straotnaemen haffelt ze zo verschrikkelike mal op omme daj zuver benauwd wodden dat die hutsjeflut dr de tonge over breken zal. Ik wete bijtieden kwaolik waor ze et over het. Ien ding is dudelik: disse blei het et stopgaoren niet uutvunnen.
  Vandaege hek verhaelen rippeteerd en ik bin mit mien grafiekverzaemeling an de gang west. Hieronder een anweenst van gister veur mien grafiekverzaemeling mythologie. Dit is een hooltgravure van de Belgische grafikus Frank-Ivo van Damme. Et stelt Aphrodite en Amor veur. Amor scheut (en scht!) magische pielken in de hatten van meensken. Hij was et hulpien, neffens sommigen de zeune, van Venus, de godinne van liefde en vruchtberhied, die ok wel Aphrodite nuumd wodt.


Naor de volgende bladziede - Naor de veurige bladziede