17 feberwaori 14.30 Ik stappe zo in de auto en komme eerst vanaovend laete weer thuus. Ik zal aanst eerst even naor et gemientehuus van Smallingerlaand in Drachten. Daor wodt bekend maekt wie de Rink van der Veldepries wunnen het. Tegere mit vier Friese schrievers bin ik nommeneerd veur mien laeste roman Een vrouw van ivoor. Dat is een grote ere, et is nooit eerder gebeurd dat een Stellingwarfstaelig boek veur die pries nommeneerd wodde. Ik zal die pries trouwens zeker niet winnen. Ik zal nooit tegen vier Friezen opboksen kunnen. De meerste kaans maekt neffens mij Willem Schoorstra mit zien roman Pier. En aanders Anne Feddema lichtkaans mit zien verhaelebundel De triennen fan Cheetah. Die boeken bin geweldig goed bespreuken in de Liwwadder Kraante. Neffens mij bin de boeken van Hylke Tromp (Noah) en Mindert Wijnstra (De seefrou) ok wel in de kraante bespreuken. De Stellingwarver Schrieversronte het indertied ok wel receensie-exemplaoren van mien roman naor de kraanten stuurd, mar et is nargens bespreuken. Gieniene het dr tot now an toe andacht an besteded. Dat zegt grif wel wat.
  Nao et gemientehuus in Drachten gao k lichtkaans uut eten mit Douwe. As daor temeensen genoeg tied veur is Want om kwat veur achte moe k op e Gediek wezen. Daor mak verhaelen vertellen veur de vrouwluden van Passage. Ze vieren heur 70-jaorig bestaon en hebben vanof de middag al feest en ik mag dat feest aovens ofsluten. Dat is mooi! Ik hebbe dr een protte nocht an!

16 feberwaori 16.50 Twintig jaor leden was mien moeder veur de laeste keer jaorig. Ik zie die beelden zo weer veur me. Een dag of viere nao heur verjaordag kreeg ze de eerste epileptische anval en wat kwam dr doe toch een vreselik malle tied. Daor daenk ik vandaege an. Ik hebbe een keersien ansteuken op heur graf.
  Gister in de naomiddag zat dr een spannegien gooldvinken in de knoppen van de prunus te pikken. Dat doen ze ieder veurjaor. En al is et officieel nog winter, alles is vule vorliker. Et is een prachtig gezicht.
  Ik gao zo naor Fokje toe te eten en daornao stap ik in de auto en rie ik naor Hoogevene. Ik mag daor vanaovend verhaelen vertellen veur de leden van et NVVH Vrouwludenetwark Hoogevene. Ik bin twie keer eerder bij heur west te vertellen: in 2002 en 2010. Ik zal zien dak dr een mooie aovend van maeken kan.
  Hieronder een foto van vleden weke: mien beide kammeraoties Boris en Joris naost mekeer en diepe in de rust op e twiezitsbaank.


Naor de volgende bladziede - Naor de veurige bladziede