17 oktober 17.00 Ik kreeg gisteraovend een hiel biezunder kedo van Piet Bakker nao mien optreden bij de Fryske Krite in Wolvege. Piet zat indertied mit mij op e ulo. Hij hadde in mien roman Een brogge van glas lezen hoe ak aachterof daenke over de lerers van doedestieds. Op e bladzieden 60 en 61 vertel ik dat mien moeder me mien plakkies bolle mitgaf in een oold, gruun, blikken segaredeusien mit et mark Fijnproever dr op. Ien van de lerers stak me daor vierkaant de gek mit an. Wat een didaktisch inzicht om dat te doen bij een teergevulig en kwetsber joongien. Ze mossen die kerel asnog een pak op e huud geven. Mar dat kan niet, de man is al jaoren dood. Hij was kompleet ongeschikt om lerer te wezen. En zo weren dr wel meer van die stoethaspels. Ik maeke me asnog weer lelk. Dat grune trommegien hak al lange niet meer. Mar van Piet kreeg ik gisteraovend percies zoen trommegien. Fijnproever was een mark van segarefebriek De Werkhorst in Stienwiek. Dr konnen vuuftig segaren in zoen deusien. Ik vien dit toch wel een hiel aorig en origineel kedogien! Kom mar es op et idee! Et staot now in mien warkkaemer.
  Vandemorgen hek op jaordagsvesite west bij Jan de webmaster. Dat is de man zonder wie ak technisch niet funktioneren kan. Een man van gewicht dus. Vandemiddag hek een fluttien dubbelcds Stellingwarver Stiekelstokkies naor de Schrieversronte in Berkoop brocht. Ze weren daor op. Ik hebbe mitien wat boeken van mezels veur de verkope mit naor huus neumen.
  Hieronder een foto Dit is dan anlopertien Floris. Hij komt hier elke dag meerdere keren an de deure om whiskas. Et dinkien het altied honger en hij ligt bijtieden lekker boven in mien hobbykaemertien op een stoel.


16 oktober 17.40 Doe k poes Boris gisteraovend in huus leut, keek die wat vremd naor et etersbakkien dat butendeure bij de veurdeure staot. En wie zat daor? Een stiekelvarken zat heerlik van de whiskas te eten. Hij keek me mit zien kleine ronde ogies an. Ik bin weer in huus gaon, hebbe et fototoestel pakt, mar krek doe k him op petret zetten zol keerde hij him omme, leup vlogge vot en flutte onder de koniferen. Mooi! Mar ik kriege op disse meniere wel een dure huusholing! Ik daenke trouwens dat ze t an mekeer deurvertellen. Daor bij die man naost de Weembos is van alderhaande lekkers te haelen! En et kost niks!
  Et is een drokke dag. Vandemiddag moch ik verhaelen vertellen in De Fontein in Liwwadden veur een groep oolderen. Vroeger hiette dat daor an de Gooldenregenstraote De Open Hof. Ik bin dr in et verleden vaeke veur alderhaande groepen west te vertellen. Et was de dadde keer dak veur disse groep vertellen moch. Ik was eerder bij heur in 1996 en 2009. In 1996 hak mien moeder bij me, die duste doe niet meer allienig te wezen. Et was die keer de laeste keer dat ze mit me mitgong. Een peer daegen laeter mos ze naor et ziekenhuus en zol ze nooit meer thuuskommen. Ik wete nog percies waor as ze die laeste keer zat in De Open Hof dat now dus De Fontein hiet. Daor docht ik vandemiddag dus an Mar dat plakkien waor ze zat is kwaolik meer te vienen, zo is de boel verbouwd. Vanaovend mak al weer vot te vertellen. Nao heur vergeerdering mak vertellen veur leden van de Fryske Krite in Wolvege.

Naor de volgende bladziede - Naor de veurige bladziede