20 oktober 11.00 Ik moet zo al weer vot. Ik mag vandemiddag vertellen in et mfc De Menterne in et Grunninger Muntendam op een middag van De Zonnebloem. Ik hoeve et niet allienig te doen, mar mag optreden mit et beroemde duo Lucas en Gea en et duo Nulennix. Die laeste beide manluden ken ik wel. Daor hek wel es vaeker mit optreden. Et is vandemiddag trouwens een onbegriepelik lang durend pergramme veur ooldere meensken. Et begint al om ien ure en et gaot deur tot half zesse. Mien hemel nog an toe! En dan twie keer een schoft van een half ure dr tussendeur. Zoks gebeurt hier nargens! Gaot dit niet te mal? We zullen zien as de meensken dit daor volholen!

19.20 Ik bin weer thuus uut Muntendam. Henne bin k over Grunningen gaon, weeromme over Assen. Wat regende et onderweg! Vreselik! Mar ik zag Lucas en Gea vandemiddag dus. Wat kun die zingen! Wat een show! Wat bin ze gewoon en aorig! En kon ik zoks mar! Zo mooi zingen kunnen is toch vule mooier as verhaelties vertellen! Ik zal dr een kollum over schrieven!


19 oktober 17.00 Vandemorgen het de auto een beurt had in de gerage in Et Vene. Ik kan dr now weer een jaor mit rieden. As extra service hebben ze him mit de haand veur me wusken! Zoks wodt slim op pries steld! Mar ak dat weten hadde hak dr gisteraovend niet zels op ommewusken. Ik hebbe een allemachtige hekel an dat soort klussies, dat ik gao altied naor de wasstraote. Mar daor wak even niet an toekommen en et ding zag dr zo vies uut, dat et me te mal was en gao dr zo mit naor de gerage toe.
  Vanaovend mak weer verhaelen vertellen. Ik gao naor Hilaard te vertellen veur de leden van Passage in drpshuus De Twatine. Ik bin ooit ien keer eerder in Hilaard west te vertellen. Dat was in april 1999 en daor moch doe iederiene uut et drp naor toe. Wat is dat al weer lange leden En ik wete et nog best.

Naor de volgende bladziede - Naor de veurige bladziede