23 oktober 17.00 Ik hebbe mooi nijs! Belangstellenden kun heur now al opgeven veur een prachtig evenement op vrijdagaovend 26 jannewaori in et Centrum veur Prentkeunst op e Fochtel en dat in et kader van LF2018. Op e aovend van de 26ste jannewaori won in tal van museums in Frieslaand biezundere veurstellings hullen. Et bin veurstellings van ongeveer veertig menuten en die won op die aovend drie keer opvoerd, zodat de meensken van museum naor museum kunnen om alderhaande verschillende veurstellings te zien. Et Centrum veur Prentkeunst dot hier ok an mit! Op e Fochtel wodt die aovend drie keer een veurstelling geven deur schriever Johan Veenstra, (dat bin ik dus) en de bekende hooltgraveur Peter Lazarov over verhaelen uut de Griekse mythologie. Peter komt dr speciaol veur uut Bulgerije naor De Fochtel. De veurstelling is twietaelig: in et Stellingwarfs en et Nederlaans. Op een groot scharm won prachtige hooltgravures van Peter zien laoten angaonde verhaelen uut de Griekse mythologie. Mit de neudige humor zal ik in et kot wat over dat verhael in et Stellingwarfs vertellen. Peter vertelt in et Nederlaans waoromme as hij de betreffende prente maekt het zoas hij die maekt het. Dr kan now al intekend wodden op e veurstellings die om 19.30 ure, 20.30 ure en 21.30 ure beginnen. Per keer kun dr 33 gaasten toelaoten wodden. De toegaank is vergees, koffie/thee mit koeke kosten mar 1,25 euro. Das veur een habbekrats! Willen jim dr henne? Mail dan even mit hoevule meensken ajm kommen willen en hoe laete. Jim kun mailen naor info@stichtingnobilis.nl Dan kriegen jim een bevestiging toestuurd. Jim meugen mij ok wel even een mailtien sturen, johan_veenstra@hetnet.nl, dan geef ik et wel deur. Ik hope jim daor op 26 jannewaori te zien! Hieronder de hooltgravure Et oordiel van Paris van Peter Lazarov uut 1996. Dat oordiel van de Trojaanse preens zol indertied de anzet geven tot de Trojaanse Oorlog. Et kan mar zo dawwe daor over vertellen gaon.


Naor de volgende bladziede - Naor de veurige bladziede