7 november – 18.00 – Eindelik gaot d’r vandaege weer gewoon wat deur. Veur morgen he’k nog wel alderhaande dingen ofzegd, mar van vri’jdag of hoop ik al mien ofspraoken weer nao te kommen. In de loop van de middag is mien leeskemmissie hier op vesite kommen om te praoten over mien ni’je roman die as warktitel De ofrekening het. Mit Fettje, Douwe, Jelle en Pieter he’k over et boek praot. Ik hebbe een hiel liesien mit netisies kregen daor a’k wat mit kan. Fouten en kleine dingen veraanderen en verbeteren en zo. Ik zal dat doen. En veerder… vienen ze et allemaole een prachtige roman! En now zuwwe hier dommiet mit mekeer waarm eten en daor helpt Fettje me bi’j. We kriegen gruuntesop mit ballegies, kookte eerpels, rooie bieten, grune boonties, appelsmotse en alderhaande kleine en verschillende toeties nao. An et aende van de aovend is iederiene veurzien van Douwe zien ni’je boek De wiete poes en oare űnfoege folksferhalen. Dat boek kwam vleden vri’jdag uut op Douwe zien verjaordag. Tot zien grote verbaozing wodde d’r an et aende van et feestelike pergramme ok nog veur him zongen. Daor hadde Douwe niet op rekend. Dat mement is op een foto vaastelegd deur Jan de webmaster.


6 november – 17.00 – Vandemiddag he’k Haarm op vesite had. We bin now weer hielemaole bi’jpraot.
  Ik kreeg lessend van Jan en Diana et boek Brinker-Jan en andere verhalen en gedichten van Hulzer-Willem te lien. Ik hebbe dat boek mit genoegen lezen en dan veural et veurnaemste pat van et boek: et lange verhael Brinker-Jan. Een verhael over et oolde Aachterhoekse boereleven. Et is in et Nederlaans schreven, mar de schriever lat de meensken gelokkig praoten in et Aachterhoeks. Dat maekt et allienig mar mooier. Et is een mooi verhael over Jan en Dine en et noodlot slat toe as Dine longontsteking krigt en et zitten lat. Laeter komt d’r nog een aandere vrouw op Jan zien pad. Een mooi verhael, mar de schriever hadde een betere uutgever verdiend. Fagus in Aalten moet him echt schaemen. Zo geef ie gien boek uut. De tekenings bi’j et verhael bin ronduut verschrikkelik slecht en dan al die fouten… Hadde de uutgever dat niet even beter naokieken kund? Aj’ in de Nederlaanse tekst iederkeer lezen: hij verteld mit een d an et aende… Wat een stel koekebakkers daor in Aalten. Hulzer-Willem hadde vule beter verdiend!

Naor de volgende bladziede - Naor de veurige bladziede