9 november – 17.00 – Et was een dag mit dokters… Ien keer in et jaor krigt poes Boris een kaorte over de post. Dan moet hi’j kommen veur et jaorlikse prikkien tegen katteziekte en zo. Zoks is een drama. Et kost muuite om poes in de bak te kriegen en onderweg klinkt klaegelik gemauw en gejammer vanof de aachterbaank van de auto. Nao et prikkien stapt poes Boris uut himzels drekt weer in et bakkien, want hi’j wil graeg naor huus toe. Mar ok dan klinkt onderweg weer gejammer…
  Vandemiddag bin ’k zels naor de dokter west om een griepspuite. Ze geven die dingen vusen te laete. In België kuj’ ze al in september kriegen. Mar hier moet eerst et halve volk ziek wezen en dan kommen ze nog es mit zoe’n ding an. Ik hope dat et nog argens goed veur is.


8 november – 17.00 – Iederiene was et d’r gister over iens dat de warktitel De ofrekening gien mooie titel is veur mien ni’je roman. Ik zal dus op zuuk moeten naor een mooiere, lichtkaans poëtischer, titel!
  Nao de drokke dag van gister ha’k veur vandaege alles weer ofzegd. Vandemorgen ha’k naor Jacob zien verjaordagsfesien zuld, mar ik gao een aandere keer wel naor Haarm en Jacob toe. Vandemiddag ha’k verhaelen vertellen zuld in Suntjehannesge. Dat ha’k ok ofzegd. Ik bin van doel en gao d’r vandaege over een weke weer op uut om verhaelen te vertellen. Ik bin now nog te mu. A’k hatstikke fit west was ha’k vanaovend naor de naojaorslezing van de Stichting Nassau en Frieslaand zuld in et Historisch Centrum in Liwwadden. Esther Schreuder vertelt daor vanaovend over de Moren. In de 18de ieuw wodden de kiender Cupido en Sideron kedo geven an de toekomstige stadhoolder Willem V. Sideron kwam van Curaçao, Cupido van Guinea in Afrike. Al sund de 14de ieuw was et gebruuk en doe zwatte kiender kedo an Noord-Europese vosten. De zwatte bedienden van de stadhoolder hadden trouwens hielemaole gien slecht leven. Ze wodden kaemerdienaar van et stadhoolderlike hof, staon op verschillende schilderi’jen mit de stadhoolderlike femilie envlochtten in de Fraanse tied mit de stadhoolder naor Engelaand. Ik hadde die lezing graeg bi’jwonen wild, mar et verstaand moet now even veurop!
  Douwe maekte me d’r attent op dat d’r vandaege een pat van et gedicht Fietsen uut mien ni’je dichtbundel De overkaant van et waeter boven een rouwadverteensie in de Liwwadder Kraante ston. Ik vien et mooi as meensken bliekber wat an mien gedichten hebben.
  Vandemiddag kwam Jan uut Wolvege even op vesite en Geertje en Sieger brochten me een boek: De Franse tuinman van Santa Montefiore.

Naor de volgende bladziede - Naor de veurige bladziede