11 november 17.00 Et is Sunte Matten. Vanaovend kommen de kiender an de deure, dat et geld en de poede vol taoimannegies liggen klaor!
  Et was gisteraovend in Noordwoolde een prachtige veurstelling over meenselike ongemakken van kabberetgroep Twee recht Twee Averecht uut Willemsoord/Stienwiek e.o. Veur een pat in de streektael. Hiel mooi. Mit et Drentse duo Harm en Roelof is dit wel haost et beste kabberet in de streektael. Humor op nivo en gien onderbroekelol. Alhoewel dat vanzels ok wel es mag.
  Vandaege biwwe weer es een dag vot west. Now ja, een daggien. Omdak nog wat anstarken moet hewwe et niet te lange maekt en we bin niet veer van huus west. We bin naor De Jouwer west en daor hewwe bij SIEP! Mannenmode veur meer as 500 euro kleren veur mij kocht. Ik hebbe dr mar es inbatst! Twie broeken, een vest, een boezeroen, een riem, twie t-shirts. En ik kreeg dr nog een peer sokken bij! Nao al die ankopen hewwe in Et Vene in t Gerecht een twaelfuurtien had: een koppien tomatesop, een plakkien bolle mit een kroket en een plakkien bolle mit carpaccio. Mit vanzels een peer bakkies drinken. We zatten dus in mien oolde kantoor. Oenema-State, de vroegere belastinginspektie. We zatten te eten in de mooie kaemer daor vroeger de inspekteur zat. Et zat dr trouwens hatstikke vol mit eters.
  Hieronder een foto van vandemiddag. Een sfeervol haastplaetien van De Jouwer.


10 november 17.00 Ik hebbe een kompleet nije ovend kregen. Mien oolde dee et niet goed en bij de febriek konnen ze de boel niet maeken. En dr zat nog geraansie op Et mooie is dat disse krek ietsien groter is zodat mien grotere bakblikken hier ok in kunnen.
  Ik hebbe De wiete poes en oare nfoege folksferhalen now al uut. Et is een prachtig boek! Douwe Kootstra en Jurjen van der Kooi hebben dr wat moois van maekt! Een boek mit een protte seks en doomnees en pastoors kommen vaeke in die oolde verhaelen veur. Dat bin in de regel nogal glundige pikeurs! Och, zokke verhaelen bin vanzels niet zomar ontstaon
  Ik zal vanaovend weer es een keer vot. Mien energie is nog niet geweldig, mar ik zal mit Fettje naor et Buurthuus in Noordwoolde. Daor speult de kabberetgroep Twee Recht Twee Averecht uut de Kop van Overiessel heur pergramme Ongemak. Dat wodt grif hiel mooi!
  Omdak van doel bin en begin ankem weke mien optredens weer te doen bin k begonnen mit et rippeteren van alle verhaelen die k dan vertellen zal in Wolvege en Drachten. Vreselik wark mar et moet

Naor de volgende bladziede - Naor de veurige bladziede