14 november 17.00 Vandemorgen hek een kruudkoeke bakt in de nije ovend. Et is prima lokt, de koeke is lekker wodden.
  Arjen, de tuunman, het hier vandaege de boel om huus opredded. Et was de achtste en laeste keer van van t jaor. Ankem jaor laot ik de tuunmannen gewoon weer kommen. Et voldot me geweldig dak dit wark zels niet meer hoeve te doen. Tussen de middag hewwe tegere brood en tomatesop had. En de vervanger van de me ontsteulen zunnewiezer staot now ok te plak. Een mooie pot mit plaanten op e sokkel daor de zunnewiezer eerder op ston. Et staot mooi! Vienen jim ok niet?


13 november 17.00 Et blift veurlopig een gedoe mit dokters. Vandemorgen mok nog even naor de huusdokter en woensdagmiddag zak naor et ziekenhuus veur een veurbespreking mit de physician assistant veur et daarmonderzuuk dat ankem weke donderdagmiddag wezen zal. Ik mag dan niet autorieden en zal perberen iene te vienen die mit me henne kan. Ik bin et vreselik zat, mar as et allemaole mar wat mitvaalt. Awwe ankem weke eerst mar weer es had hebben.
  Ik hebbe et boek De raadselachtige gemeentewapens van de Stellingwerven van Frans Wuijts now hielemaole lezen en bekeken. Et is een prachtig uutvoerd boek. De stokken over de mythologie vun ik et mooiste!
  Krek as gistermiddag hek vandemiddag een tippien fietst. Dat is grif gezond! En ik hebbe vanzels verhaelen rippeteerd en een peer heufdstokken van de nije roman naokeken.

Naor de volgende bladziede - Naor de veurige bladziede