16 november 18.00 Vandemiddag hek verhaelen verteld in et gebouw Holdert in Drachten veur een groep senioren. Ik hadde daor al meerdere keren eerder west te vertellen. Et was hiel genoeglik. Et vertellen gaot weer goed, mar mien energie is nog beparkt. Daoromme hek veur vanaovend een etentien ofsleugen. Dat vien ik wel hiel arg jammer, mar ik wil drekt niet weer twie dingen op een dag doen moeten. Vandezoemer hebben verschillende meensken wat daon op e verjaordag van Sippy Tichgelaar en now mochten die meensken mit heur en heur man Marten uut eten bij Bos op Schoterziel. Ik was graeg mitgaon, mar een meens moet ok es verstaandig wezen. Now even niet. Ik zegge op et ogenblik tegen alderhaande verzuken gewoon van nee. Ik wil alles niet meer moeten. Et is een keer genoeg. Dan doen aanderen mar es een stap hadder.

15 november 17.00 Gister kreek et 150ste nommer van et Drents Letterkundig Tiedschrift Roet over de heerd. Ik daenke dak van et begin of an abonnee west hebbe. Dit is trouwens een mooi nommer! Ik hebbe et gister mit genoegen lezen!
  Vandemorgen hek een kollum schreven over # Me Too. Et is een onthullende kollum wodden! Hool de Liwwadder Kraante mar in de gaten!
  Vandemiddag hek naor et ziekenhuus west en van die vieze troep mitkregen die k ankem weke woensdagaovend en donderdagmorgen opdrinken moet, om schone te wodden veur et daarmonderzuuk. Bah! Dr is ok even bloed prikt. Ik mos daor vandemiddag bij Vrouw Noordman wezen. Ik praotte Stellingwarfs en zij praotte keurig Stellingwarfs weeromme. Ze vertelde dat heur moeder Stellingwarfs was en dat ze op Der Izzerd woonde. Dat is dan wel weer mooi!
  En vanaovend zak dan weer veur de eerste keer uut vertellen nao de griep en de koorse. Ik bin nog altied gauw mu. Mar ik hoeve vanaovend mar drie kertier te vertellen veur de vrouwluden van Passage in De Rank in Wolvege. Et is mitien heur alderlaeste bijienkomst. Ze stoppen dr in Wolvege ok mit. Et is overal etzelde lietien. Gien nije anwas, alles vergriest, gieniene wil meer in et bestuur. In sneltreinvaort won dit soort verienings opheven. Zunde. Wat gaot dr een protte verleuren.

Naor de volgende bladziede - Naor de veurige bladziede