19 november 17.00 Vanaovend moek mar es weer naor de Nederlaanse tillevisie kieken (Ik vertrek), de laeste daegen kon k et argens aanders beter en vule mooier kriegen. Vrijdagaovend hek op Belgi naor een oflevering van de Engelse pelisieserie Vera keken. Prachtig! Ik bin gek op Vera. Wat is dat toch een mooie vrouw! En drekt daor aachteran kwam et eerste diel van de twiede serie van Victoria over et leven van de Engelse keuninginne mit dezelde naeme. Wat een prachtige rolle van Jenne Coleman! Gisteraovend hek op BBC First de eerste twie dielen zien van de psychologische thriller Liar. Superspannend! Wie liegt en wie niet? En dan hek in et weekaende ok nog heufdstokken uut mien nije roman op fouten naokeken. En gister hek een Dutch Apple Bread bakt en vandaege een Friese kruudkoeke.

18 november 17.00 Ien keer in et jaor laot ik wat vellegies persoonlike postzegels maeken deur PostNL. Et bin dit jaor vellegies wodden mit een petret van keuning Willem III, dat schilderd wodde deur Nicolaas Pieneman in 1856. Et hangt in et Rieksmuseum in Amsterdam. Et Rieksmuseum gaf me toestemming om et petret veur de postzegels te bruken. Et is van t jaor percies twiehonderd jaor leden dat Willem geboren wodde. Wie zoen vellegien hebben wil, moet mar even tiedinge doen. De kostpries is 9,15 euro. Losse postzegels kosten 91 centen! Et was de zesde keer dak zoen vellegien maeken laoten hebbe. Op e veurige vuuf vellegies stonnen de Friese stadhoolder Willem Frederik, Maria Louise van Hessen-Kassel (Marijke Meu), Anna Paulowna, keuning Willem II en preens Maurits. Ankem jaor komt dr een vellegien mit et petret van keuninginne Sophie, de eerste vrouw van keuning Willem III. Et is dan twiehonderd jaor leden dat zij geboren wodde. Ik hebbe van Peleis Et Loo al toestemming kregen om dan een petret van Sophie te bruken dat in Et Loo hangt. Hieronder et vellegien van keuning Willem III.


Naor de volgende bladziede - Naor de veurige bladziede