23 november 14.20 Om kwat over twaelf wodde dr beld vanuut et ziekenhuus. Ik kon drekt wel kommen. Mar dat kon vanzels niet. Ik was nog lange niet klaor en dr mos iene vanuut Et Vene kommen om me henne te brengen. Hoe zok dan drekt op stel en sprong kommen kunnen? Now, dan hoefde et niet en kon k gewoon op e tied kommen die ofpraot was: kwat over drieje. Dat now komt Jan de webmaster hier zo mit de auto om me op te haelen. Hij brengt me naor et ziekenhuus, want ik mag niet autorieden. Ik komme daor aanst an een infuus op bedde te liggen, ze plakken me dingen op e huud, en dan is et daarmonderzuuk om kwat veur viere. Daornao slaop ik uut. Ak weer wakker bin praot ik mit de dokter en dan kriek, nao goed 24 uren, wat te eten. Een crackertien mit keze of zo mit wat drinken. Zo gaot et temeensen altied. Daornao trek ik de kleren an en belle Jan de webmaster op. Dan komt die en brengt me weer naor huus toe. Ik hope dak om een ure of zeuven weer thuus bin. En dan bin k de rest van de aovend wel toekocht.

22 november 17.00 Vandemorgen hek in Wolvege eerpels van de mark haeld en vandemiddag hek een bak vol boeken van de Schrieversronte in Berkoop kregen. Ik stao de kommende zaoterdag mit boeken en vellegies postzegels op e Wintermark in Mildam. Ik stao mit een dissien in de grote zael van Hof van Schoterlaand. Kom mar langes!
  Ik ete now nog een peer plakkies witte bolle en dan eet ik de kommende 24 uren niks meer. Tussen zeuven en negen ure vanaovend moek een liter vieze troep opdrinken mit een liter gewoon drinken dr bij. En dat moet morgenvroeg tussen acht en tien ure weer.

21 november 17.00 Mien postzegelvellegies mit keuning Willem III vliegen et hiele laand al deur: Den Dungen, Et Vene, Liempde, Huzen, Veldhoven, Loosdrecht En een nije inwoonster van Nijhooltpae kwam om een peer vellegies an de deure. Zoks is slimme aorig! En et was ok aorig dat ze een kedogien veur me mitneumen hadde: et boekien De aaibaarheidsfactor van Rudy Kousbroek. Een boekien over poezen!
  Vandemiddag van twaelf tot goed twie ure wak bij Van der Valk in Sneek veur een meer as veurtreffelik lunchbuffet veur de postaktieven van de belastingdienst. Dat was hiel aorig! We weren mit meer as honderd man. Van t veurjaor een boottocht, now een lunchbuffet Et kan niet op! Ik bin mit Jan en Durkje uut Wolvege mitreden naor Sneek en bij heur in Wolvege hek zokrek ok nog een bakkien drinken had. Hieronder een internetfoto van Van der Valk in Sneek.


Naor de volgende bladziede - Naor de veurige bladziede