24 november 17.30 Ik mag niet liegen. Ik schreef gister dak an een infuus kwam te liggen. Dat was niet zo, ik kreeg wel een infuusnaalde in de aarm, as et mos kon k dus zo an een infuus. En veerder hak inderdaod plakkerties op e huud, een knieper op e vinger en een bloeddrokmeter om de aarm. Ik lag dr mooi bij. En dr gebeurde wat dr altied gebeurt. Ik hadde et idee dak altied wakker was. Dat ik vreug me of wanneer as ze now toch es begonnen en waor as iederiene was. Mar doe wawwe al een schoft veerder in de tied en was alles al lange an de kaant. Ze laggen trouwens veur op et schema, dat ik was om kwat veur zesse al weer thuus. Jan de webmaster zette krek de auto veur et ziekenhuus henne doe een zuster me nog naokwam. Ze hadden hielemaole vergeten en hael me de infuusnaalde uut de aarm weg. Ik hadde dr ok niet an docht. Dat in de hal van et ziekenhuus is dat nog gauw gebeurd. De daarmziekte is niet aktief, mar dr zit wel argens een wontien dat nog zeker een maond behaandeld wodden moet. Omdak oolder wor en as colitispesjent een grotere kaans op daarmkanker hebbe moek in et vervolg elk jaor zoen daarmonderzuuk hebben. Vervelend, mar wel goed vanzels. Ik moet now nog wat fitter zien te wodden. Ik doe mien dingen allemaole wel weer, mar ik neme dr gien extra klussen bij an. Now niet en in de toekomst ok niet meer. Et het een keer mooi genoeg west. Ik doe allienig nog dingen daor ak echt nocht an hebbe. Uut vertellen gaon dus wel en ik stao morgen mit genoegen op e Wintermark in Mildam mit boeken en postzegels!
  Ziekenhuus Tjongerschaans in Et Vene is dudelik een meertaelig ziekenhuus. Nederlaans, Fries en Stellingwarfs. Dat is te zien an de servetten!


Naor de volgende bladziede - Naor de veurige bladziede