26 november – 17.00 – Vandaege bin ’k begonnen en rippeteer de verhaelen die ’k woensdagaovend in De Vri’jhiedshof in Oosterwoolde vertellen zal. Elke dag een peer, dan is et dan wel klaor en kan ’k ze hopelik zonder fouten te maeken vertellen.
  Ik hebbe vandaege een tippien kuierd en ok een kollum schreven over de Friezen die zomar een snelweg blokkeren, volk uut de Raandstad tegenholen, en zodoende de verkeersveilighied in geveer brengen. Soms zit et gevuul et verstaand in de wege. Dat is mit meensken now ienkeer zo. En och, zoks is de Stellingwarvers in et verleden ok wel es overkommen. Ik vertelle in die kollum over een gruwelik mar waorgebeurd verhael uut oonze geschiedenis. Hool de kraante mar in de gaten!
  Et was vandaege echt weer om geld te tellen, dat ik hebbe de omzet van de Wintermark van gister in Mildam berekend en bin uutkommen op een bedrag van 212,65 euro! Hiel mooi!

25 november – 17.30 – Vandemorgen wa’k al om kwat over negen in resteraant Hof van Schoterlaand in Mildam. Krek over de Kuunder, een goeie honderd meter buten de Stellingwarven… In de grote zael he’k doe mien boeketaofel inricht veur de jaorlikse Wintermark die op verschillende plakken in Mildam hullen wodt. Ik daenke dat dit de vierde keer was da’k daor west bin. Of was et de vuufde? De tied gaot hadde… Et was in ieder geval, zoas alle jaoren, slimme genoeglik an de aandere kaant van de Kuunder. Van verscheiden meensken heurde ’k dat die mien belevenissen daegeliks volgen op mien webstee en dus wussen da’k eregister in et ziekenhuus lag! D’r kwammen veural vandemiddag een protte bezukers langes. Ok hiel wat bekenden! Hieronder mien kammeraoden Haarm en Jacob uut Et Vene. En… ik hebbe best verkocht!


Naor de volgende bladziede - Naor de veurige bladziede