29 november 17.00 Vandemorgen op bedde hek de laeste teksten veur vanaovend rippeteerd. Ik moet vanaovend al om kwat veur zeuven in De Vrijhiedshof, een flat in Oosterwoolde, wezen. Ik mag daor verhaelen vertellen veur de bewoners. Ik hebbe alles goed rippeteerd, et moet dus goed gaon. Et is mooi dat et al zo vroeg begint, dan bin k ok mooi op e tied weer thuus. Ik bin zo staorigan een stok fitter an t wodden en niet zo mu meer! Ik krieg elke dag Nutridrink van Nutricia dat boordevol energie zit. Dat now ja, zo raek ik lichtkaans ok weer vol energie!

28 november 17.00 Op mien veurige kollum in de Liwwadder Kraante, die van twie weken leden over de kastboom die k in de grieze kontener mieteren wol, bin nogal wat reakties kommen. Verschillende keren is me de laeste tied deur goenend vraogd ak dat al daon hadde. Ja, gister hek de hiele santemekliek in de kontener smeten. Kastboon, slingers, ballen Vot mit die rotzooi! Ik bin niet haandig genoeg en zet zoen ding in mekaander. Ik kope now binnenkot zoen kaant en klaor ding. Das een stok makkeliker veur een hampelman as ik bin. Op e kollum #notme van vandaege bin ok al een peer reakties kommen. De meensken konnen dr gelokkig omme lachen!
  Vandemorgen hek ex-kollega Fedde uut Et Vene, mar van vroeger uut Wolvege, op vesite had. Jaoren en jaoren hewwe beidend op e ofdieling CK van de belastinginspektie in Et Vene zeten. We zatten zels tegenover mekeer! Ik wete nog hiel goed dat hij en Sara trouwd binnen. Middags biwwe doe naor et stadhuus van Bolsward west en naor de karke van Tjerkwerd. En aovens weer die kaant op veur de brulloft. Sara hadde een blauwe jurk an En dat is de kommende donderdag allegeer veertig jaor leden! Zollen zij wel weten dak die trouwerije bruukt hebbe in mien debuutroman Een vlinder van zulver? Ik hebbe et him vandemorgen niet verteld, mar maeke et now dan mar bekend!

27 november 18.00 Mien laeste roman Een vrouw van ivoor en mien laeste dichtbundel De overkaant van et waeter bin praktisch nargens meer te kriegen. Et spul is uutverkocht en beide boeken won niet herdrokt. Mar ik hebbe van elk boek nog een vuuftien exemplaoren over. Dat as dr dagboeklezers/-lezeressen binnen die toch nog graeg beide boeken of ien van de boeken hebben willen, moen die me mar even tiedinge doen. Dan komt et wel goed!
  Ik hebbe mien vuuf foksias in huus haeld. Ze hebben nog nooit eerder tot zo laete in de tied butendeure staon. Twieje bluuiden ok nog mooi. Mar now verwaachten ze in de loop van de weke dat et naachs vriezen zal en daor kun ze niet tegen. De agave laot ik nog even buten staon, die kan wel een peer graoden vost hebben. Dat daor begin ik nog niet mit omme te slepen.
  Vandemiddag hek op vesite west bij Haarm en Jacob in Et Vene. Nog veur Jacob zien verjaordag. Doe kon k dr niet henne omdak grieperig en koorsig was. We hebben now genoeglik even bijpraot.

Naor de volgende bladziede - Naor de veurige bladziede