11 december 17.00 Vandaege ston mien 240ste kollum in de Liwwadder Kraante. Dat is toch een respektaobel tal. Of niet dan? Dr kwam ok een mailtien angaonde die kollum van een zekere Hennie. Ze mailde dat et misschien toch nog wel goedkomt mit me. Dat hoop ik dan mar. Et liekt dr op dat mien volgende kollum eerst over vier weken in de kraante komt. Vandaege over twie weken is et ommes eerste kastdag en vandaege over drie weken is et nijjaorsdag. Op die daegen kommen dr gien kraanten. Dus komt de volgende kollum op 8 jannewaori. Die kollum hek gister schreven. Vandaege gong de kollum over oonze daegen in Den Bosch en de volgende kollum gaot over oonze daegen in Mestricht. Aj goed opletten en om je henne kieken, ziej altied wel wat waor aj over schrieven kunnen. Zo gaot et mij temeensen. En now... zak nog een lekkere kruudkoeke bakken!

10 december 17.20 Omdat et Stellingwarfs now ok officieel een tael is, wol een koppeltien ambteners van et gemientehuus in Wolvege graeg wat meer van en over et Stellingwarfs weten. Ze hebben mij indertied benaoderd, kultuurambtener Hans Breukel het mit me overlegd, en ik hebbe twie aorige vrouwluden van et gemientehuus op e koffie had. Aenlik wok et eerst niet doen, want ik kan wel vertellen uut eigen wark, mar ik bin gien schoelemeester en taelkundige. Mar ze wollen beslist dak kwam. Dat zo bin k vandemiddag dus op et gemientehuus west en hek een ure verteld over et Stellingwarfs. Wat veur tael et is, van welke taelen et femilie is, de taelindieling in Europa, hoe en waor nationaole taelen ontstaon binnen, biezundere en aorige overienkomsten tussen Stellingwarfs en Engels en Stellingwarfs en Duuts, de eerste Stellingwarver schriever S.L. Brug, de verschillen in et Stellingwarfs en zo meer... Ik hebbe vanzels ok over mien eigen wark verteld en een verhael en een gedicht heuren laoten. En... et gong hiel goed. Ik praotte et ure zomar vol en dat hak nooit docht. Ik hebbe een mooie bos bloemen kregen en die staot hier now te pronke op e taofel! Nao mien belevenissen op et gemientehuus hek wat bosschoppen daon en ik hebbe bij Gooitske theedronken.

Naor de veurige bladziede